ജെസിബി

ബാലകൃഷ്ണൻ മൊകേരി

വാനത്തിൻ മോന്തായത്തിൽ

കേറിനിന്നവൻ സൂര്യൻ

തീപെയ്യിക്കുമുച്ചയിൽ,

ഗ്രാമത്തിൻ ചെമ്മൺ പാത

ചാലിട്ടിട്ട് നിരന്തരം

പൊടിക്കാറ്റുപാറ്റിപ്പായുന്ന

ടിപ്പർലോറികൾ കണ്ട്

നമ്മുടെ നാടെന്നും,

നമ്മുടെ പ്രകൃതിയെന്നും

മോങ്ങാനിരിക്കും കവിയോട്

നിർത്തെടാ നീയെന്ന്

കാർക്കിച്ചുതുപ്പുന്നു

മുൻ വിപ്ലവക്കാരൻ!

നീ കാണുന്നതൊരുവശം

മാത്രമെന്നയാൾ ,

മറുവശം വിപ്ലവാനുകൂലം

അതുകാണാതിരിക്കയോ ?

"യന്ത്രമാം രാക്ഷസക്കൂട്ടം

മദിക്കുന്നതും നോക്കി

മിണ്ടാതിരിക്കുവാനാമോ

നമുക്കെ?"ന്നാക്കവി ചോദ്യമായ്

കയർത്താൻ വിപ്ലവക്കാരൻ,

നിനക്കറിയില്ലൊരു ചുക്കുമേ,

നിനച്ചാലേതു വിപ്ലവത്തേക്കാൾ

മാറ്റം വരുത്തുവോരിവർ,

ചോരചിന്താത്ത രാക്ഷസർ!

സവർണ്ണത്തമ്പുരാക്കൾത-

ന്നെട്ടുകെട്ടുകൾ,കോട്ടകൾ

ജെസിബി കുഴികോരുന്നൂ

ടിപ്പർ നാട്ടിൽ പരക്കെയായ്

കൊണ്ടുപോയവർണ്ണർതൻ

കുപ്പയിൽ കുഴിമൂടുന്നൂ!

നിനച്ചിരിപ്പതിൻ മുമ്പേ

മാറുന്നൂ നാട്ടിൻപുറം !

ഏതുവിപ്ലവമിതേപ്പോലെ,

മാറ്റമുണ്ടാക്കി നാടിതിൽ ?

സമൂഹമാറ്റമുണ്ടാക്കാൻ

തോക്കുകൾ തോറ്റുപോയെടോ

ആയുധങ്ങൾ യഥാകാലം

പുതുക്കിവെക്കണമെപ്പൊഴും

കാല്പനിക വിപ്ലവക്കാരൻ

മുന്നോർമ്മയിൽ കൺകളിൽ

പന്തങ്ങളെരിയിക്കവേ

കവി മിണ്ടാതിരിക്കയായ്!

അപ്പോഴും മോന്തായത്തിൽ

തീവാരിയെറിഞ്ഞുകൊ-

ണ്ടിരിക്കയാണാസൂര്യൻ

ആരെക്കാത്തിരിക്കയോ ?! ?

*****************