ഇരയും വേട്ടക്കാരനും

 ......................................

ബാലകൃഷ്ണൻ മൊകേരി

പകയും വിദ്വേഷവും

പുകയായ് പരക്കുമ്പോൾ,

ആരു നീ, ഞാനാരെന്ന്

വീരവാദങ്ങൾ ചുറ്റും !

കാറ്റിലെക്കരിയില

പോലവ കണ്ണിൽ വീണു

കരടായ്, കടച്ചിലായ്

മാറുന്ന നിമിഷങ്ങൾ!

എൻ പക, വടിവാളായ്

മാറുമ്പോൾ, നിനക്കുള്ളിൽ

വിളയും പക, ബോംബായ്,

ഉഗ്ര വിസ്ഫോടങ്ങളായ് !

ചിതറിത്തെറിക്കുന്ന -

തീഞാനോ, നീയോ, നമ്മൾ

രണ്ടുപേരുമോ? കാലം

നമ്മളൊത്തൊടുങ്ങിയോ?

ഒടുവിൽ നീയും ഞാനും

കഥയായ് മാറുമ്പോഴും

പകതൻ പരാഗണം

തുടരാതിരിക്കുമോ?

അപ്പോഴും നീയും ഞാനും

കൊല്ലുവാനൊരുങ്ങുമോ?

അപ്പോഴും ചാവുന്നതീ -

നമ്മളാകുമോ? നമു-

ക്കിവിടെപ്പുലരുവാൻ

തടസ്സം നാം തന്നെയോ?

ഇരയായ്, വേട്ടക്കാര-

നായി,നാമിടയ്ക്കിടെ -

ക്കെട്ടിയാടിടും വേഷം

ചിരമായുപേക്ഷിക്കാം,

മനസ്സിൽ വിടരുന്ന

പക തൻ വിഷച്ചെടി

വേരോടെ പിഴുതിടാം!

കിളച്ചു മറിച്ചിടാം!

അവിടെ സ്നേഹത്തിൻ്റെ

ഗന്ധമൂറിടും പൂക്കൾ

വിടരും ചെടിയൊന്നു

നട്ടിടാം, മറക്കാതെ!