പുതുവർഷമായാലെന്താ ?

-ബാലകൃഷ്ണൻ മൊകേരി

ജാലകത്തിനപ്പുറത്ത്

ആഘോഷരാവിൻ ജനക്കൂട്ടവിജനത,

പൊട്ടിത്തെറിക്കുന്ന ഒച്ചകളുടെ

അഗാധനിശ്ശബ്ദത!

മുറിയിൽ ഞാൻ വിഷണ്ണനായി

മരുഭൂമികൾ സ്വപ്നംകാണുന്നു.

ഏതോ പരസ്യഇടവേളയിൽ

വാതിലിൽ മുട്ടുകേൾക്കുന്നു

തുറന്നപ്പോൾ,

ഒരു ചെറിയ കുഞ്ഞ്,

വാരിയെല്ലുകൾ തെളിഞ്ഞ നെഞ്ചുമായി,

മുഷിഞ്ഞ കോണകംമാത്രമുടുത്ത

ഒരു അവശവിവശശിശു!

തുറന്ന വലിയ കണ്ണുകളിൽ

കദനത്തിന്റെ മഹാമരുഭൂമികൾ

മരീചികപോലെ,

ചുണ്ടുകളിൽനിന്ന്

കേലയായൊഴുകിവീഴുന്ന

അപ്രിയമൊഴികൾ!

തീക്കട്ടപോൽ പൊള്ളുന്ന

നീയാരെന്നു ചോദിക്കെ,

പുതുവർഷമെന്നു മറുപടി!

അകത്തുകടക്കാനായുന്ന

അവനോടുഞാൻ

ആർടിപിസിആർ ടെസ്റ്റിന്റെ

നെഗറ്റീവ് റിസൽറ്റുകാണിക്കാൻ

പറയുന്നു

അവനെന്നോട്,

എന്തിനേയും പോസിറ്റീവായിമാത്രം

കാണണമെന്നാവശ്യപ്പെടുന്നു!

അവനെ തള്ളിമാറ്റി

വാതിലടച്ചുകുറ്റിയിടുന്നു!

പുതുവർഷമായാലെന്താ

ടെസ്റ്റ് റിസൽറ്റിലാണ് കാര്യമെന്ന്

ഞാൻ ഡയറിയിലെഴുതുന്നു

31/12/21