നാട്ടുപച്ച
ബാലകൃഷ്ണൻ മൊകേരി
നഗരമെന്നിൽ പെരുപ്പിച്ചെടുത്തതാം
നടുതലകൾ, വളരുന്ന ഭീതികൾ
സിരകൾതോറും കുതിക്കുന്ന ചോരതൻ
ഗതിയുയര്‍ത്തുന്ന സമ്മര്‍ദ്ദമേളകൾ!
നിദ്രയ,ല്ലതിൽ പേടിസ്വപ്നങ്ങൾതൻ
ക്ഷുദ്രകീടകം തീണ്ടുവാനെത്തുന്നു!
ജീവനാളുന്ന യന്ത്രമായങ്ങനെ
ജീവിതത്തിൻ പുറമ്പോക്കുഭൂമിയിൽ
നീറി നീറിയിരിക്കവേ,നാവിന്റെ
തുമ്പിലേതോ മധുരമാം സാന്ത്വനം
നാട്ടുപച്ചകൾ, ഓര്‍മ്മച്ചെരിവിലെ
നിത്യമാം നീരുറവകൾ,പൂവുകൾ
നാട്ടുപച്ച , യുഗങ്ങള്‍ക്കുമപ്പുറം
നട്ടുപോറ്റിയ പൈതൃകപ്പേച്ചുകൾ !
നാട്ടുപച്ചകൾ,ഉൾക്കരുത്തേറുവാൻ
നമ്മള്‍ തേടുമീയൗഷധ ച്ചെപ്പുകൾ!
ചേര്‍ത്തുനിര്‍ത്താൻ മറന്നുനാമെപ്പൊഴും
ദൂരെ ദൂരെ വലിച്ചെറിയുന്നവ!
വീണദിക്കിൽ മുളയ്ക്കാതിരിക്കില്ല
നാട്ടുപച്ചകൾ നാടിൻ കരുത്തുകൾ!
*************************
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ