അർത്ഥം

ബാലകൃഷ്ണൻ മൊകേരി

how long have I been

to wait for

thine soft touch

to transform

me,

a black rock,

in to life?

മുറിയിലെത്തുമ്പോൾ

എന്റെ ചങ്ങാതി,

ഡയറിയിൽനിന്ന് ചീന്തിയെടുത്തൊരു

കടലാസുകഷണത്തിൽനോക്കിയിരിക്കുന്നു.

ഇതുനോക്കൂ,ചൊന്നാനവൻ,

അപ്പുറത്തുള്ളവീട്ടിലെ പുതിയ അതിഥി

അവിടുത്തെ ചേച്ചിയുടെ

സർക്കസ്സുുകാരിയായ അനിയത്തി,

ലീവിൽവന്നവൾ

അതിരാവിലെ കസർത്തുകളിക്കുവോൾ,

മലക്കംമറിയുവോൾ

അർഥംപറയാൻ തന്നതാണ്.

അപ്പുറത്തെ വീട്ടിന്റെ

പിന്നാമ്പുറത്തെ

പാതിയടഞ്ഞ ജനൽപ്പാളിക്കപ്പുറം

ആർദ്രമായ രണ്ടുമിഴികൾ

എന്റെ സുന്ദരനായ ചങ്ങാതിയെ

ഇടയ്ക്കിടെ വന്നുതലോടുന്നുണ്ടായിരുന്നു.

പ്രേമലേഖനമല്ലേയെന്ന്

സാമാന്യവത്ക്കരിച്ചപ്പോളവൻ

അവളിതിന്റെ അർത്ഥം എഴുതിക്കൊടുക്കാൻ

ഏല്പിച്ചതാണെന്ന് പറയുന്നു.

ഏത് ശുഷ്ക്കനിരൂപകനും

ഈ വരികളുടെ പ്രണയസൂചന മനസ്സിലാവുമെന്ന്

ഞാൻ പറഞ്ഞപ്പോൾ,

നീയതിന് നിറംകൊടുക്കുകയാണ്,

അവൾ, ആ പാവം പെൺകുട്ടി

അർത്ഥമറിയാനായിമാത്രം ചോദിച്ച

ഒരു കാവ്യശകലം

ചില കാവ്യനിരൂപകരെപ്പോലെ

ദുർവ്യാഖ്യാനംചെയ്യരുതു നീയെന്ന്

ശബ്ദമുയർത്തി ചങ്ങാതി.

അവളിവിടെ ഒരുമാസക്കാലംകാണുമെന്നു

ചേച്ചിപറഞ്ഞിട്ടുണ്ടെന്നും,

നിന്റെ ദുസ്സംശയങ്ങളെല്ലാം

അപ്പോൾതീരുമെന്നുംപറഞ്ഞു ചങ്ങാതി.

പിന്നെയാകടലാസ്സിന്റെ

മറുപുറത്തയാൾ,

അക്കവിത മലയാളത്തിലേക്ക്

മൊഴിമാറ്റിക്കൊണ്ടിരുന്നു.

രാവിലെ കോളേജിലേക്കുപോകുമ്പോൾ

അതയാളവൾക്കു കൈമാറിയത്രേ.

സന്ധ്യക്കുതിരിച്ചെത്തുമ്പോൾ,

മുറ്റത്തുനില്ക്കുന്ന ചേച്ചിയോട്

സർക്കസ്സുകാരിയെപ്പറ്റി ചോദിക്കെ

അവൾ തിരിച്ചുപോയെന്നവർ.

ലീവുകേൻസൽചെയ്ത്പോയതാണെന്നും

പെട്ടെന്ന് തിരിച്ചുചെല്ലാൻ

മെസേജുവന്നെന്ന്

അവൾ പറഞ്ഞന്നും ചേച്ചി.

പാവം,കുട്ടി,

ആളും ആരവങ്ങളുമൊഴിഞ്ഞ്

ചേച്ചീടെകൂടെനില്ക്കുമ്പോൾ

എന്തൊരു സന്തോഷമാണെന്ന്

കഴിഞ്ഞദിനവും പറഞ്ഞിരുന്നു!

കൊതിക്കണ്ണുകള്‍ക്കിരയായി

ട്രപ്പീസിൽ തൂങ്ങിയാടാനാണ്

പാവത്തിന്റെ വിധിയെന്ന്

ചേച്ചിയുടെകണ്ണിൽ

നീരുറയുന്നതുകണ്ടപ്പോൾ,

‍ഇതിനെപ്പറ്റി

ചങ്ങാതിയെന്താവും പറയുകയെന്ന്

ചിന്തിക്കയായിരുന്നു ഞാൻ !

********************************