ചൂണ്ട

( ഒരു ബാല്യ സ്മരണ )

ബാലകൃഷ്ണൻ മൊകേരി

ആകാശം മഴയിൽ നന്നായ്

കുളിച്ചു,കുളിര്‍കോരവേ,

ആറാനിട്ട വെയിലിന്റെ

തുമ്പിനാൽ തോര്‍ത്തിനില്ക്കവേ,

രമേശനും ഞാനും ചേര്‍ന്ന്

ചൂണ്ടയെടുത്തിറങ്ങിടും !

(മനസ്സിൽ പുഴമത്സ്യങ്ങള്‍

പുളയ്ക്കും ദൃശ്യഭംഗികള്‍ !)

മുണ്ടകൻപാടമന്നേരം

പാട്ടുപാടിരസിക്കയാം,

മീനത്തിൻ വേവിനാലന്ന്

വെള്ളമറ്റൊരു തോടിതാ,

നിറയെ ചളിവെള്ളത്തിൽ

പുളയ്ക്കും കാഴ്ച സുന്ദരം!

തഴക്കൈതക്കുണ്ടപറ്റി

ഞങ്ങളെത്തുന്നു,ചൂണ്ടയിൽ

ഇരകോര്‍ത്ത്,തോട്ടിലേക്കിട്ട്

കാത്തുനില്ക്കുന്നു നിശ്ചലം!

പിന്നിൽ നടവരമ്പത്തൂ-

ടാളുകള്‍ പോയി ചന്തയിൽ

അരിയും മീനും വാങ്ങി-

ത്തിരികെപ്പോകയാണവര്‍,

കിട്ടിയോതോനെ മീനെന്ന്

ചോദിക്കുന്നുണ്ടതിൽച്ചിലര്‍,

കേട്ടില്ലെന്നു നടിക്കുന്നൂ,

ഞങ്ങള്‍ ചമ്മിയിരിക്കയായ്!

ചൂണ്ടമെല്ലയുയര്‍ത്തുമ്പോ-

ളൊന്നുമില്ലതിൽ,നഗ്നമായ്

നാണംപൂണ്ടു ചിരിക്കുന്നൂ

ചൂണ്ട,ഞങ്ങളുമാവിധം!

കൈയിൽ നനവുതട്ടാതെ

മീൻകോരിയെടുക്കുവാൻ

കഴിവില്ല ഞങ്ങള്‍ക്കെന്നു

ബോധ്യമായതുനേട്ടമായ്.

ക്ഷമയും നേടുവാനായീ

ചൂണ്ടയാൽത്തന്നെയെന്നതും

നന്ദിയോടെ സ്മരിക്കുന്നൂ

ഗുരുതന്നെയനുഭവം!

...................................