പരിഭാഷ - 16

റോഡ് ക്രോസിംഗ്

ബാലകൃഷ്ണൻ മൊകേരി

റോഡിനപ്പുറം പാർക്കിൻ്റെ മോഹനം

റോഡിലേറെത്തിരക്കാണ് വാഹനം!

അപ്പുറത്തേയ്ക്കു പോകാൻ കഴിയാതെ -

യിപ്പുറത്തു ഞാൻ നിന്നു കുഴയവേ,

ബസ്സുകൾക്കെന്തു വേഗം, നിരന്തരം

വന്നു പോവതിനില്ല ഗത്യന്തരം!

ലോകമെങ്ങുമിറങ്ങിയ വണ്ടിക-

ളാകെയുണ്ടീ വഴിയിൽ, ശപിച്ചു ഞാൻ,

അപ്പുറം കടന്നീടുവാനാവാതെ -

യിപ്പുറം തന്നെ നിന്നു മോഹിക്കവേ,

കൂടെയുള്ളൊരു ബാലകൻ, ചുറ്റിലു-

മൊന്നു നോക്കിയാപ്പാത മുറിച്ചു പോയ്,

എത്ര വേഗം! അതു കണ്ടു ഞാൻ നില്ക്കവേ,

എൻ്റെ ശ്വാസം നിലച്ചതുമാതിരി !

നിങ്ങളേതു കടുത്ത പ്രശ്നങ്ങളും

നിഷ്പ്രയാസം പരിഹരിക്കുന്നവർ !

( ഇപ്രകാരം മടിച്ചു, മടിയരായ്

നില്ക്കുവോർ ഞങ്ങ,ളെങ്കിലും ബാലരേ,

ഇപ്പുറം നില്ക്കെ,യപ്പുറത്തെത്തുമീ

മാനസങ്ങളാൽ നന്മകൾ നേർന്നിടാം!)