നാട്ടാഴം

ബാലകൃഷ്ണൻ മൊകേരി

നാട്ടാഴം,കത്തുമുച്ചയ്ക്കും

നീന്തിനില്ക്കുന്ന ഭീതികൾ!

കയത്തിൽ,തെളിവെള്ളത്തിൽ

മയക്കംപൂണ്ട മീനുകൾ

മാനംനോക്കിക്കിടക്കുന്നൂ,

മനക്കണ്ണിൻമടുപ്പുുകൾ !

പൂത്തപാലകളോരത്തായ്

കാത്തുനില്ക്കുന്ന യക്ഷികൾ !

കാഞ്ഞിരത്തിൽ ദ്രവിച്ചേപോയ്

മന്ത്രവാദത്തുരുമ്പുകൾ!

വക്കത്തെ കൈതോലയിൽ,

കൊക്കുതാഴ്ത്തിയ പൊന്മയും

കാത്തിരിക്കുന്നു ,താഴത്തെ

പുൽത്തടത്തിൽ തവളയും!

പായലിൻ മുഖംമൂടിയി-

ട്ടൊളിച്ചേനില്പുു താമര !

കറുത്തിരുണ്ട വെള്ളത്തിൽ

വരാലിനുണ്ടു ജാഗ്രത

പരപ്പിന്നളവുകള്‍തേടി

പാഞ്ഞുപോകുന്നു പാമ്പുകൾ!

പൊടിമീനുകള്‍ നാണിച്ച്

നാലുപാടുമൊളിക്കയായ്

ആഴത്തിൽ വേറൊരാകാശം

മേഘംപൂത്തുകിടക്കയായ് !

നിധികാക്കുന്നു പൂതങ്ങൾ

നാട്ടാഴത്തിന്റെ നന്മയിൽ!

‍ജലോപരിയുയർന്നെത്തും

ചിലപ്പോള്‍ ചില കുമിളകൾ!

പൂതത്തിൻ വിനിമയപ്പൂൂരം

പുറത്തേക്കു കുതിക്കയാം

ഇടയ്ക്കാനിധികുംഭങ്ങൾ

വെയിൽക്കണ്ണിലുയർന്നിടും!

അതുകണ്ടാൽ,നോക്കുമാറില്ല

ഞങ്ങള്‍,തലതിരിഞ്ഞുപോം!

പൂതത്തിൻ കൂടെയുണ്ടാവും

കയത്തിൽച്ചത്ത പിശാചികൾ !

പാതിരാവിൻ നടവരമ്പിൽ-

പ്പാട്ടുപാടുംലഹരികൾ !

നാട്ടാഴം സുന്ദരം, ക്രൗര്യം

നാവുനീട്ടുന്ന വന്യത,

നാട്ടാഴം നന്മതൻനാട്യം,

നട്ടുപോറ്റുുന്ന ജീവിതം!

**********************അക്ഷരം ഡിജിറ്റൽ ത്രൈമാസികത്തിന്റെ പ്രഥമലക്കമാണ്.https://online.fliphtml5.com/qmddh/mddg/#p=1ലിങ്ക്