മേഘസന്ദേശം

- ബാലകൃഷ്ണൻ മൊകേരി

മാനത്തിൻ നടവരമ്പത്തുകൂടി,

മണ്ണിനെക്കൊഞ്ഞനം കുത്തി,

വെളിനാട്ടിലേക്കു പറക്കുന്ന

ജലവാഹിനി മേഘങ്ങളെ,

മിന്നൽക്കയറിനാൽ കെട്ടി,

നടുപ്പുറത്ത് രണ്ടിടിയും നല്കി

തിരികെയെത്തിക്കാൻ

ഈ മണ്ണിൻ വരണ്ട നെഞ്ചിൽ നിന്ന്

ഉയർന്നു വന്നൊരു ചുഴലിക്കാറ്റും

എതിർപ്പിൻ്റെ,

ന്യൂനമർദ്ദവും മതിയായിരുന്നു !

കള്ളക്കടത്തു നടത്തിയ

ജലസമ്പത്തു മുഴുവൻ

മണ്ണിൻ്റെ കാല്ക്കലർപ്പിച്ച്,

കള്ള മേഘങ്ങളിപ്പോൾ

പടിപ്പുറത്ത് പതുങ്ങി നില്പാണ്

പല നിറത്തിൽ

മഞ്ഞളിച്ചങ്ങനെ !

മേഘസന്ദേശമിത് കാളിദാസനെ

കാത്തിരിപ്പാണ് പുതുചരിത്രത്തിൽ.....

..................................................................