ഗൃഹാതുരം 2
ബാലകൃഷ്ണൻ മൊകേരി
കേട്ടെഴുത്തിലെ ചിഹ്നനംതെറ്റി-
ക്കേട്ടുനില്ക്കെയാ മാഷിൻ ശകാരം,
നീട്ടിനിന്നു നാംകൈവെള്ള,തന്നിൽ
കിട്ടിടും ചോന്ന പാടുകള്‍ വാങ്ങാൻ!
കണ്ണുപൂട്ടി,ക്കരങ്ങളെല്ലാരും
കാരിരുമ്പിൻ കരുത്തേകി നീട്ടി,
കാത്തിരിക്കെയറിഞ്ഞു,നീ തല്ലാൻ
കൊണ്ടുപോയിക്കൊടുത്തൂ വടികള്‍ !
നീ കൊടുക്കും വടിയവര്‍ക്കിഷ്ടം,
നീക്കുപോക്കില്ല ശിക്ഷാവിധിയിൽ !
കൂട്ടുകാരനായെപ്പൊഴും കൂടെ-
ക്കൂടിടുമ്പോഴു,മൊറ്റുകാരൻ നീ !
കൂട്ടുകൂടാതെ നിന്നോടു, ഞങ്ങള്‍
കൂവളത്തിൻ തണലത്തുനില്ക്കെ,
നീ വരുന്നുണ്ടിലപ്പീപ്പി നല്കി
നീരസങ്ങള്‍ക്കറുതിവരുത്താൻ !
പിന്നെ ഞങ്ങളൊരുങ്ങിനില്ക്കുന്നു
നിന്നെ ബന്ധിച്ചു മാറ്റിനിര്‍ത്തീടാൻ!
ഇന്നതോര്‍ക്കെ,ക്കനക്കുന്നിതുള്ളിൽ
കുറ്റബോധം, മറക്ക നീ,യെല്ലാം !
*********************
27 Comments
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ