കഥാര്‍സിസ്
കൊല്ലാന്‍ തോന്നിയിട്ടുണ്ട്
പലരേയും, പലപ്പോഴും !
കൈകാണിച്ചിട്ടും നിര്‍ത്താതെ പോയ
ലൈന്‍ ബസ്സിന്റെ ഡ്രൈവറെ,
ഇഷ്ട നായികയെ അപമാനിച്ച്
നിയമം കാറ്റില്‍ പറത്തുന്ന
സിനിമയിലെ വില്ലനെ,
പൊതുമുതല്‍ കട്ടു മുടിച്ചിട്ടും
കേസില്‍നിന്നും തലയൂരുന്ന നേതാവിനെ,
കടം വാങ്ങിയതു തിരിച്ചു തരാതെ
കള്ളുകുടിച്ച് പുലഭ്യം പറയുന്ന
നാട്ടുകാരനെ,
അപവാദ വ്യവസായിയെ,
കണികേറിവരുന്ന പിരിവുകാരെ,
പെണ്ണുങ്ങളുടെ മുന്നില്‍ വെച്ച്
കളിയാക്കി രസിക്കുന്ന
കൂട്ടുകാരനെ....
കൊല്ലാന്‍ തോന്നിയിട്ടുണ്ട്
ഇങ്ങനെ,
പലരേയും പലപ്പോഴും!
എങ്കിലുമെനിക്ക്
പേടിയാണ് നിയമത്തെ
അതുകൊണ്ട്
കമ്പ്യൂട്ടര്‍ ഗെയിം തുറന്ന്
വെടിവച്ചു കൊല്ലുന്നു
ഞാനനേകരെ...!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ