കഥാപാത്രങ്ങള്‍
-ബാലകൃഷ്ണൻ മൊകേരി
കഥ രാമായണമായിരുന്നു.
നാടകകൃത്ത് തന്നെ
സംവിധായകനും.
രാമനായി അഭിനയിക്കുന്ന നടൻ
ബാറിൽവെച്ച് മദംമൂത്ത്
സംവിധായകനുമായി തെറ്റി!
ഒരു സ്ക്രിപ്റ്റിലുമില്ലാത്ത നാറുന്നതെറി
ഇയ്യാംപാറ്റകള്‍പോലെ
തലങ്ങും വിലങ്ങും പറന്നപ്പോള്‍,
സഹികെട്ട സംവിധായകൻ
നടനോടു പറഞ്ഞു :
"നിനക്കു ഞാൻ കാട്ടിത്തരാമെടാ,
എന്നോടോ നിന്റെ കളി ?,
സീതാപഹരണത്തിനെത്തുന്ന രാവണൻ
പുഷ്പകവിമാനം തകര്‍ന്ന് ചാവുന്നതായി
ഞാൻ മാറ്റിയെഴുതും !
പിന്നെ നീ,
എങ്ങനെ സീതാദേവിയെ വീണ്ടെടുത്ത്
വിജയശ്രീലാളിതനാവും ?”
കാട്ടിലേക്കയച്ച് കൈകഴുകും ?
ഞൊടിയിടകൊണ്ട് ലഹരിയിറങ്ങിയ നടൻ
സംവിധായകന്റെ കാലിൽവീണ്
മാപ്പുതരണേയെന്നു കെഞ്ചുമ്പോള്‍,
സംവിധായകൻ പറഞ്ഞു :
രാമനും രാവണനുമെല്ലാം
സംവിധായകന് വെറും
കഥാപാത്രങ്ങള്‍ മാത്രമാണ് !
.........................................................
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ